Bakit hindi kita niligawan?

Sa panahong uso ang pakiramdaman na lang at mga relasyong no label, old school man pero d’un pa din ako sa liligawan kita. Sabi nila mahirap na rin namang maniwala sa nanliligaw, pwede namang pakitang-tao lang, best foot forward k’se ‘di ba? Sino ba naman ang magpapakita ng masamang ugali n’ya kung nasa stage palang s’ya ng panliligaw.

Siguro sa akin eh, sabihin mo mang pakitang-tao, sabihin mo mang puro positive lang ang ipapakita sa’yo, pero still, ‘yung puntong nag-effort s’ya magpakitang tao, ‘yung nag-effort s’ya na ipakita lang ang mga positibong bagay sa’yo, malaking bagay na ‘yun, kumpara sa taong nag-iintay lang at hindi kayang sumugal na magpakita ng pagka-gusto sa’yo. ‘Yun lang harapin n’ya ang posibilidad na mabasted s’ya, big thing na ‘yun. Isipin mo na lang na okay lang sa kanya na magmukhang tanga masabi n’ya lang na gusto ka n’ya. Mas gugustuhin mo ba ang taong walang balls na linawin ang mga bagay-bagay sa inyong dalawa? Mas gugustuhin mo ba ang taong kahit sa sarili n’ya ay ‘di malinaw ang nararamdaman sa’yo? Naniniwala akong kung ‘di ka n’ya kayang ligawan ay ‘di sapat ang pagmamahal na meron s’ya para ipagsigawan n’ya ang nararamdaman n’ya sa’yo.

Pero bakit hindi kita niligawan?

Duwag ba ako? ‘Di ko ba kayang mabasted? ‘Di pa ba sapat ang pagmamahal na meron ako para sa’yo? Kasama ba ako sa mga taong ang gusto lang ay instant na relasyon na ‘di pinaghihirapan? O sadyang mayabang lang ako na naniniwala akong ‘di na kita kailangang ligawan?

Hindi kita niligawan dahil mahal kita.

Ang gulo ko ba?

Hindi kita niligawan dahil mahal kita. 

Alam kong I will never be enough. Alam kong magiging sobrang hassle lang para sa’yo. Siguro tinuruan na rin ako ng kasaysayan na it will never be easy at ayokong pagdaanan mo ‘yun. Meron kang mga gusto, merong mga gusto ang mga parents mo na ‘di ko mabibigay. Merong ineexpect ang society sa’yo at siguro ‘di ko kaya na mahirapan ka. Sobrang mahal kita na kaya kong isantabi ang sarili ko para sa’yo. Sobrang mahal kita na ‘di na kita ilalagay pa sa situation na  kailangan mong magdecide.

(Hahahahahahahaha as if naman big deal sa’yo ang existence ko hahhahahahahahahha)

Bakit ko ba sinusulat ‘to?

Gusto ko lang sabihin sa’yo na mahal kita. Oo, tumigil na ako magparamdam sa’yo, pero ‘di ako tumigil ng pagmamahal sa’yo. Siguro in time, matatawa na lang ako uli na sinulat ko ‘to. Pero habang mahal pa kita, hayaan mo na lang akong magsulat sa’yo.

‘Yung matinong sagot, bakit hindi kita niligawan?

Dahil ‘di pa man ako nagsisimula, binasted mo na ako.

Without words, you said no.